ឯកឧត្តម ឧត្តមសេនីយ៍ឯក នួន ស្រេង អគ្គនាយក នៃអគ្គនាយកដ្ឋានសវនកម្មក្រសួងមហាផ្ទៃ បានអញ្ជេីញចូលរួមជាគណៈអធិបតីក្នុងកិច្ចប្រជុំឆ្លងរបាយការណ៍ និងបិទការងារសវនកម្មផ្ទៃក្នុងនៅរដ្ឋបាលខេត្តស្វាយរៀង
ចេញផ្សាយ ពី P.M.C.TV
នៅព្រឹកថ្ងៃសុក្រ ៨រោច ខែមិគសិរ ឆ្នាំខាល ចត្វាស័ក ព.ស. ២៥៦៦ ត្រូវនឹង ថ្ងៃទី១៦ ខែធ្នូ ឆ្នាំ២០២២នេះឯកឧត្តម សុខ រស់ អភិបាលរងខេត្តស្វាយរៀង តំណាង ឯកឧត្តម ម៉ែន វិបុល អភិបាលខេត្ត ឯកឧត្តម ឧត្តមសេនីយ៍ឯក នួន ស្រេង អគ្គនាយក នៃអគ្គនាយកដ្ឋានសវនកម្មក្រសួងមហាផ្ទៃ បានអញ្ជេីញចូលរួមជាគណៈអធិបតីក្នុងកិច្ចប្រជុំឆ្លងរបាយការណ៍ និងបិទការងារសវនកម្មផ្ទៃក្នុងនៅរដ្ឋបាលខេត្តស្វាយរៀង សម្រាប់ការិយបរិឆ្ឆេទ ២០២១ និងបណ្តាឆ្នាំពាក់ព័ន្ធ ស្ថិតនៅសាលប្រជុំសាលាខេត្តស្វាយរៀង។ ក្នុងនាមតំណាងឲ្យឯកឧត្តមអភិបាលខេត្ត ឯកឧត្តម សុខ រស់ សម្តែងនូវការស្វាគមន៍យ៉ាងកក់ក្ដៅចំពោះវត្ដមាន ឯកឧត្តម អគ្គនាយក នៃអគ្គនាយកដ្ឋានសវនកម្មផ្ទៃក្នុង ក្រសួងមហាផ្ទៃ និងគណៈប្រតិភូ ដែលបានចំណាយពេលវេលាដ៏មមាញឹក និងមានតម្លៃផ្ដល់កិត្ដិយសក្នុងកិច្ចប្រជុំនៅថ្ងៃនេះ។ ឯកឧត្តមបន្តថា ការងារសនវកម្មផ្ទៃក្នុង ត្រូវបានចាត់ទុកថាជាការងារអាទិភាពមួយដ៏មានសារៈសំខាន់ និងទទួលបានការយកចិត្ដទុកដាក់យ៉ាងខ្លាំង ហើយការអនុវត្ដកិច្ចការនេះ បានក្លាយជាកាតព្វកិច្ចដែលកំណត់ដោយច្បាប់ និងលិខិតបទដ្ឋានគតិយុត្ដនានា ។ ការងារសវនកម្មផ្ទៃក្នុង ជាកិច្ចការដែលមានភាពឯករាជ្យ និងជាមុខងាររបស់ស្ថាប័ន ដែលបានផ្ដល់នូវគុណតម្លៃបន្ថែម និងលើកកម្ពស់ប្រសិទ្ធភាព និងប្រសិទ្ធផល នៃកិច្ចប្រតិបត្ដិការនានារបស់ស្ថាប័ននីមួយៗ ដែលជួយ ឱ្យសម្រេចនូវគោលបំណង តាមរយៈការពិនិត្យមើល និងវាយតម្លៃនូវកិច្ចដំណើរការនានា នៃការគ្រប់គ្រងហានិភ័យ ការត្រួតពិនិត្យ និងអភិបាលកិច្ចរបស់ស្ថាប័ន ។ ឯកឧត្តមបន្ថែមទៀតថា ក្នុងនាមរដ្ឋបាលខេត្ត សូមកោតសរសើរ និងវាយតម្លៃខ្ពស់ ចំពោះការចុះបំពេញបេសកកម្មការងារនៅខេត្ដស្វាយរៀង របស់ក្រុមការងារគណៈប្រតិភូអគ្គនាយកដ្ឋានសវនកម្មផ្ទៃក្នុង ក្រសួងមហាផ្ទៃ និងសូមថ្លែងអំណរគុណ ដល់លោក លោកស្រី ជានាយកទីចាត់ការ/អង្គភាព អភិបាលក្រុង ស្រុក មេឃុំ ចៅសង្កាត់ និងភាគីពាក់ព័ន្ធ ដែលបានសហការ និងបង្កលក្ខណៈងាយស្រួល ដល់ក្រុមការងារសវនកម្មផ្ទៃក្នុង ធ្វើឱ្យដំណើរការការងារសវនកម្ម ប្រព្រឹត្ដទៅដោយរលួនល្អ និងទទួលបានលទ្ធផល ហើយរៀបចំកិច្ចប្រជុំឆ្លងរបាយការណ៍ និងបិទការងារសវនកម្មផ្ទៃក្នុង នាពេលនេះ។ ដោយលោក គង់ វ៉ាន់ឌី
