សម្តេចនាយករដ្ឋមន្ត្រី ប្រកាសបញ្ចប់ទទួលថវិកាសម្រាប់ «មូលនិធិកសាងហេដ្ឋារចនាសម្ព័ន្ធតាមព្រំដែន» ចាប់ពីថ្ងៃទី៣១ ខែតុលា, សប្បុរសជនចូលរួមបានថវិកាជាង២៦លានដុល្លារ
ចេញផ្សាយ ពី P.M.C.TV
សម្តេចនាយករដ្ឋមន្ត្រី ប្រកាសបញ្ចប់ទទួលថវិកាសម្រាប់ «មូលនិធិកសាងហេដ្ឋារចនាសម្ព័ន្ធតាមព្រំដែន» ចាប់ពីថ្ងៃទី៣១ ខែតុលា, សប្បុរសជនចូលរួមបានថវិកាជាង២៦លានដុល្លារ (ភ្នំពេញ)៖ ខុទ្ទកាល័យសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានប្រកាសបញ្ចប់ការទទួលថវិកាសម្រាប់ «មូលនិធិកសាងហេដ្ឋារចនាសម្ព័ន្ធតាមព្រំដែន» ចាប់ពីថ្ងៃទី៣១ ខែតុលា ឆ្នាំ២០២៤នេះតទៅ។ ខុទ្ទកាល័យសម្តេចនាយករដ្ឋមន្ត្រី បានឱ្យដឹងថា គិតត្រឹមព្រឹកថ្ងៃទី២០ ខែតុលា ឆ្នាំ២០២៤នេះ មានប្រជាពលរដ្ឋខ្មែរជិត៧០ម៉ឺនអង្គ/នាក់ បានចូលរួមបរិច្ចាគវិភាគទានស្ម័គ្រចិត្តដោយទទួលបានទឹកប្រាក់សរុប ២៦,៣៣២,៨៨៣.០០ដុល្លារ។ ខុទ្ទកាល័យសម្តេចនាយករដ្ឋមន្ត្រី បានបញ្ជាក់ថា វិភាគទានស្ម័គ្រចិត្តដែលទទួលបាននេះ នឹងត្រូវយកទៅប្រើប្រាស់ក្នុងការកសាងហេដ្ឋារចនាសម្ព័ន្ធតាមព្រំដែន ដោយផ្តោតលើការកសាងផ្លូវក្រវាត់ព្រំដែន។ សម្តេចមហាបវរធិបតីនាយករដ្ឋមន្ត្រី បានថ្លែងអំណរព្រះគុណថ្វាយប្រគេនសម្តេចព្រះសង្ឃ ព្រះរាជាគណៈ ព្រះថេរានុត្ថេរៈគ្រប់ព្រះអង្គ និងថ្លែងអំណរគុណយ៉ាងជ្រាលជ្រៅបំផុត ជូនចំពោះប្រជាពលរដ្ឋខ្មែរគ្រប់មជ្ឈដ្ឋានទាំងក្នុង និងក្រៅប្រទេស ដែលបានស្ម័គ្រចិត្តចូលរួមយ៉ាងផុលផុសលើកិច្ចការអភិវឌ្ឍព្រំដែន។ ជាមួយការជូនព័ត៌មានបញ្ចប់ការទទួលប្រាក់នេះ ខុទ្ទកាល័យសម្តេចបានអំពាវនាវជនរួមជាតិទាំងក្នុង និងក្រៅប្រទេស ដែលមានបំណងចូលរួមបរិច្ចាគវិភាគទានស្ម័គ្រចិត្តក្នុង «មូលនិធិកសាងហេដ្ឋារចនាសម្ព័ន្ធតាមព្រំដែន» សូមបន្តទាក់ទងក្រុមការងារមូលនិធិ និងធ្វើការបរិច្ចាគទៅកាន់គណនីធនាគាររបស់មូលនិធិឱ្យបានរួសរាន់មុនថ្ងៃទី៣១ ខែតុលាឆ្នាំ២០២៤៕ អត្ថបទទាំងស្រុង៖ វ៉ាន់ សារាយ #៣នាទីពីសង្គមនិងនយោបាយ
